وفاء حمودة
اوعو تفتكروا اني دي كلمتي ولا كلمة أي مواطن مصري، دي كلمة سكان غزة اللي منورة علي الآخر اللي الريس مورسي عايز يبعت لهم وجبات ساخنة ويسيب المصريين ياكلوا من الزبالة مع القطط والكلاب والعرس والفيران بس ده كله فدا غزة
هي البوادر طبعا كانت باينه من اولها ده حتى يوم القسم الكهرباء انقطعت
نبدأ نتكلم في مشكلة الكهرباء أي نعم أيام مبارك كانت الكهرباء بتقطع لكن مش بالمعدل ده خالص، ناهيك أن مبارك عمره ما نور غزا وساب مصر مش دفاعا عنه بس دي الحقيقة
الكهرباء بتقطع بالأيام عن البيوت طيب قلنا بلاها تكيفيات أنا شخصيا ماعنديش تكييف واكيد مش ده السبب الرئيسي لقطع الكهربا ء ولو وقفنا التكيفات والمراوح والتلاجات وقعدنا في الحر وشربنا من القلة المشكلة مش هتتحل
السبب هو من شبكات التشغيل حالتها متهالكة وكمان نقص السولار اللي برضك بيروح علي غزة ويمكن بيلعب بيدله في اماكن تانية وإحنا مش عارفين
يعني كارثة اقتصاية شبكات محتاجة احلال وتجديد مصادر طاقة تانية كل دي بلاوي واترمت عليك يا مورسي، ولازم تحلها وخلال الميت يوم اللي عدي منهم اكتر من تلاتين يوم
طبعا العقل يقول التفكير في مصادر طاقة تانية زى الطاقة الشمسية اللي رزاعة في نفخونا طول الوقت، طبعا حد فلوط من الفلاليط بتوع الجماعة بتاعتك هيطلع ويقول لأ دي ما تنفعش اصل تكلفة التشغيل عالية هاقوله لا يا فالح لو في مستثمر جه وعمل مشروع كبير اكيد هينجح بس طبعا المستثمرين طفشانين نظرا لحالة البلد ما علينا
صحيح اخبار محطة الطاقة النووية في الضبعة إيه لسة الاهالي بيكسروا السور ولا بطلوا و هتطلع قماش قصدي طاقة ولا لسة
المهم يا مورسي فكر أنت في حل للمشكلة دي مش شغلي اني افكر لك لا أنت ولا حكومة التكنوقراط وافتكر أن المشكلة مش في الكهرباء اللي بتقطع علي البيوت
في مشكلة في انقطاع الكهرباء عن المصانع واماكن العمل وتوقف عجلة الإنتاج اللي أساسا واقفة من شهور، أنا في الاقسام مش هيعرفوا يكهربوا المساجين بس دي مش مشكلة لآن الاقسام برة الخدمة من أساسه.
كمان المخابز والناس مش هتلاقي عيش اكتر واكتر يعني يقفوا يتسلوا في الطابور لوقت اكتر، كدة لازم يكون في اجازة بدل تفرغ لطوابير العيش
أما المستشفيات اللي مفايش فيها مولدات وحتى لو في مولد مش هيشتغل غير لوقت قصير اوي بس طبعا طظ في العمليات هي الناس بتعمل عمليات ليه وطظ في الناس اللي في العناية المركزة يموتوا أحسن ، وطظ في الأطفال اللي في الحضانات جم الدنيا ليه وطظ في الناس إلي بتعمل غسيل كلوي الخ الخ الخ
أما الشوارع والمحلات التجارية مش مشكلة الشوارع كلها بلطجية كدة شغلها هيكون اسهل ولو أن مش بيفرق لهم الفجر وصل بيهم انهم يدخلوا الفنادق يفرضوا عليها اتاوات وباي باي يا سياحة
في البيوت طبعا الناس آخر ما هتزهق ومع زيادة الوقت اللي الكهرباء بتقطع فيه هيلاقوا حاجات تانية يتسلوا بيها غير التلفزيون والنت ،ومع توافر الفياجرا والمنشطات الجنسية ومحاولة الشعب تنفيس الكبت والمعاناة توقع زيادة عدد المواليد اللي طبع هتضطر تأكلهم وتشربهم وتحميهم وتفليهم مش أنت بابا وأنت ماما وأنت كل الناس
مورسي بدل ما تنور غزة نور مصر عشان الناس ما تنفجرش فيك اكتر ماهي منفجرة ، خلي بالك الناس منفلته وروحها في مناخيرها ومش طايقة نفسها. وعلي فكرة اللي يعوزه البيت يحرم علي الجامع ده مثل مصيري أصيل إلا لو أنت مش مصري واهلك وعشيرتك غزوايه وحماسوية
قبل ما اختم عايزة اسألك سؤال مالوش علاقة بموضوع الكهرباء
ليه ماصدرش أي بيان عن الرياسة ولا أي فعل فيما يختص بااللي بيحصل في دهشور والبدراشين ، افتكر التاريخ القريب مش البعيد ….. كنيسة القدسيين وصلت مبارك لنهايته بعد سلسلة من الكوارث المشابهة
وماتقلش انك قلت اللي عمل حاجة هيتحاسب ؟؟؟ الملف كله لازم يتفتح من أوله من أيام الرؤساء السابقين ده بس عشان ماتحصلهمش قبل ما الميت يوم يخلصوا
